ٹیلی وژن رپورٹر فارمولا رپورٹ کیسے بناتے ہیں؟
۔
اینکر کے پڑھنے کے لیے دو تعارفی جملے اور پھر خبر کے چار چھ جملے لکھے، دو تین لوگوں سے بات کی، کیمرے پر آکر دو جملے بولے، اپنا نام لیا، رپورٹ تیار۔
میں ایک ڈمی پیکج کا اسکرپٹ پیش کرتا ہوں۔
۔
تعارفی جملے (انٹرو یا او سی):
کراچی کی جاوید نہاری ملک بھر میں مشہور ہے۔ لوگ نہاری کھانے کے لیے شہر بھر سے یہاں آتے ہیں۔ عبدالشکور کی رپورٹ
رپورٹر کی آواز اور ریسٹورنٹ کی ویڈیو: یہ بِل جمع کرنے والوں کی قطار نہیں بلکہ لوگ نہاری کھانے کے لیے انتظار میں لگے ہوئے ہیں۔ لوگ کہتے ہیں کہ جاوید کی نہاری نہیں کھائی تو کچھ نہ کھایا۔
ایک دو شہریوں کی گفتگو (ساٹ):
بہت مزے کی ہے۔
ہم ہر ہفتے یہاں آتے ہیں۔
مجھے نلی نہاری پسند ہے۔
رپورٹر کی آواز اور ریسٹورنٹ کے کچن کی ویڈیو:
جاوید نہاری کے مالک جاوید کا کہنا ہے کہ وہ نہاری بنانے کے لیے خالص مسالے استعمال کرتے ہیں اور نہاری بنانے کی خاص ترکیب استعمال کرتے ہیں۔
مالک کی گفتگو (ساٹ):
ہم حفظان صحت کا خیال رکھتے ہیں کیونکہ شہریوں کی صحت ہمیں پیاری ہے۔
رپورٹر کی آواز اور ریسٹورنٹ کی ویڈیو:
روزانہ سیکڑوں لوگ خاندان سمیت نہاری کھانے آتے ہیں۔
رپورٹر کیمرے کے سامنے (پی ٹی سی):
جاوید نہاری کراچی کی پہچان بن چکی ہے اور دوسرے شہروں سے آنے والے بھی یہاں کھانا پسند کرتے ہیں۔
کیمرامین عبدالغفور کے ساتھ عبدالشکور، پکوان نیوز، کراچی
۔
اسمارٹ فون کے دور میں مہنگے کیمرے لازم نہیں اور سٹیزن جرنلسٹ کے لیے لوگو والے مائیک کی ضرورت نہیں۔
اگر آپ کسی مسئلے یا واقعے یا دلچسپ موضوع پر ویڈیو رپورٹ بناکر بھیج سکتے ہیں، تو میں خوشی سے بے لاگ کی ویب سائٹ اور سوشل میڈیا پر شئیر کروں گا۔
لوگوں سے بات کرنے کی ضرورت نہیں۔ ویڈیو ایڈٹ کرنے کی ضرورت نہیں۔ اپنے فون کیمرے سے تھوڑی سی ویڈیو بنالیں۔ دو منٹ کیمرے کے سامنے آکر تفصیل بتادیں۔
اس طرح یہ شکایت ختم ہوجائے گی کہ میڈیا ہر وقت سیاست اور سیاست دانوں کی کوریج کرتا ہے اور عوامی مسائل و معاملات پر کم توجہ دیتا ہے۔
میں اور آپ اربوں روپے سے قائم کیے گئے ٹی وی چینلوں سے بہتر کام کرسکتے ہیں۔
۔
مجھے 63 ہزار افراد فیس بک پر فالو کرتے ہیں اور سو لفظوں کی کہانی کے صفحے پر سوا تین لاکھ سے زیادہ فالوورز ہیں۔ پانچ دس بھی اچھے سٹیزن جرنلسٹس مل جائیں تو میڈیا کا رخ بدل سکتا ہے۔
No comments:
Post a Comment