لکھنے کا طریقہ علیم احمد ..

چلیے، سمجھانے کی کوشش کرتا ہوں:

بلاگ میں ’’نقطہ ارتکاز‘‘ (point of concentration) موجود ہو،  اندازِ بیان بھی ’’مدیر کے نام خط‘‘ والا بلکل نہ ہو۔

”مدیر کے نام خط“ سے مراد ہے، وہ جو آپ اخبار میں دیکھتے ہونگے letter to editor کا حصہ ہوتا ہے وہ کہلاتا ہے۔ جس میں سرسری باتیں لکھی جاتی ہے، طریقہ کار نہیں ہوتا۔

بلاگ کی ابتداء میں تعارفی پیراگراف ہونے چاہئیں، یعنی آپ جس بارے میں بات کرنا چاہ رہے ہیں، اس بارے میں کچھ ایسا تعارف جو پڑھنے والے کو اپنی طرف متوجہ کرے۔

درمیان کے حصے میں بات آگے بڑھاتے ہوئے، مثالوں کی مدد سے، اپنے نکتے پر مزید روشنی ڈالیے تاکہ قاری کو آپ کی بات سمجھ میں آئے۔

آخری حصے میں بات کو اختتام کی طرف بڑھائیے اور واضح انداز اختیار کرتے ہوئے ایسا انداز اختیار کیجیے جو قارئین کو آپ کی کہی ہوئی باتوں پر قائل بھی کرے۔

اور پھر بلاگ کو اس طرح ختم کیجیے کہ پڑھنے والے کو تشنگی کا احساس نہ ہو۔

ان اصولوں پر عمل کرتے ہوئے اپنا بلاگ تحریر کیجیے لیکن ایک بار پھر یاد دلا دوں کہ اندازِ بیان بالکل واضح ہونا چاہیے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دوسری چیز یہ ہے کہ بلاگ کے نکتے پر آنے کےلیے حتی الامکان مختصر تمہید کا سہارا لینے کی عادت ڈالیے کیونکہ آج کل کا قاری بہت عدیم الفرصت ہے۔ زیادہ طویل تمہید اسے ’’بور‘‘ کردے گی اور ہوسکتا ہے کہ وہ تمہید بھی مکمل طور پر نہ پڑھے؛ اور چھوڑ کر بھاگ جائے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایک مشق کروانا چاہ رہا تھا جو ہمارے اساتذہ نے ہم سے بہت کروائی۔

وہ مشق یہ ہے کہ لکھتے وقت خود کو اپنی ہی تحریر کا قاری بنا لیا جائے... ایک ایسا قاری جو نفسِ مضمون کے بارے میں تھوڑا بہت جانتا اور مزید جاننے کی خواہش بھی رکھتا ہو، لیکن اس کی علمی استطاعت بھی ناکافی ہو۔

ایک اصول ہمیشہ ذہن میں رکھیے: اگر کسی قاری کو تحریر سمجھنے کےلیے دو سے تین مرتبہ پڑھنی پڑ گئی تو یہ قلم کار کی پہلی بڑی ناکامی ہے۔

ایک ایسا قلم کار جو اپنے عہد کے اعتبار سے زندہ رہنا چاہتا ہو، وہ ہمیشہ اس انداز میں لکھتا ہے کہ جو اس کے متوقع قارئین کےلیے آسانی سے سمجھ میں آنے والا ہو۔ کئی مرتبہ ایسا ہوتا ہے کہ ہم اپنی تحریر میں بھاری بھرکم اور ثقیل الفاظ استعمال کرکے یہ سمجھتے ہیں کہ ہم نے اپنی علمیت کا ثبوت دے دیا ہے۔ حالانکہ معاملہ اس کے برعکس ہے۔ نفسِ مضمون پر لکھنے والے کی گرفت جتنی اچھی اور مضبوط ہوگی (اور وہ زبان کو بھی اتنی ہی خوبی سے جاننے والا ہوگا) تو وہ ہمیشہ مشکل الفاظ اور گنجلک پیرایہ بیان پر سادہ، سہل اور رواں اندازِ تحریر کو ترجیح دے گا۔ اس مقصد کےلیے وہ ہر ممکن طور پر آسان الفاظ استعمال کرے گا۔

آپ اپنی تحریر کو ’’مانجھنا‘‘ (یعنی خوب سے خوب تر بنانا) سیکھیں تاکہ آنے والے وقت میں دوسروں کی رہنمائی کرسکیں۔

بہت لکھے کو تھوڑا جانیے گا۔